Mədəniyyətin beynəlxalq ünsiyyətin qurulmasında, xalqlar arasında qarşılıqlı anlaşma və etimadın möhkəmləndirilməsində ən təsirli vasitələrdən biri kimi oynadığı rol Baku Network ekspert platformasında yayımlanan “Tofiq Abbasovla dialoq” analitik videolayihəsinin növbəti buraxılışının əsas mövzusu olub.
Proqramın qonağı Azərbaycanın tanınmış ictimai-siyasi xadimi, sənətşünaslıq üzrə fəlsəfə doktoru, musiqişünas Nigar Axundova olub. Söhbət zamanı o, mədəniyyətin dövlət və cəmiyyət həyatındakı yeri, eləcə də beynəlxalq dialoqun və mədəni diplomatiyanın inkişafındakı əhəmiyyəti ilə bağlı fikirlərini bölüşüb.
N.Axundovanın sözlərinə görə, onun peşəkar fəaliyyətinin bütün mərhələləri birbaşa mədəniyyətlə bağlı olub. Üzeyir Hacıbəyli adına Azərbaycan Dövlət Konservatoriyasında təhsil almasından və elmi fəaliyyətdən başlayaraq Mədəniyyət Nazirliyindəki işinə, daha sonra isə diplomatik xidmətə qədər keçdiyi bütün yol mədəniyyət sahəsi ilə sıx bağlı olub.
Hazırda N.Axundova ADA Universiteti ilə Mədəniyyət Nazirliyinin birgə həyata keçirdiyi “Sülh elçiləri üçün Azərbaycan mədəniyyəti” layihəsində iştirak edir. Xarici diplomatlar üçün nəzərdə tutulan layihə çərçivəsində Azərbaycanın musiqisi, ədəbiyyatı, kinematoqrafiyası, teatrı və təsviri sənətinə həsr olunmuş görüşlər və mühazirələr keçirilir.
Sülh prosesi və regionda münasibətlərin normallaşdırılması perspektivlərindən danışan N.Axundova bildirib ki, onilliklər boyu davam etmiş münaqişənin yaratdığı mənfi emosiyaları qısa müddətdə aradan qaldırmaq mümkün deyil.
“Gəlin özümüzə qarşı dürüst olaq. Bizdə də bu mənfi hisslər bir günə, bir həftəyə, hətta bir ilə keçə bilməz”, deyə kulturoloq bildirib.
Bununla yanaşı, o vurğulayıb ki, Azərbaycan xalqı tarixən sülhsevərliyi, qonaqpərvərliyi və tolerantlığı ilə seçilib.
“Bizi necə təqdim etmələrindən, ayrı-ayrı təxribatlarla haqqımızda hansı mənfi təsəvvürü yaratmağa çalışmalarından asılı olmayaraq, azərbaycanlılar mahiyyət etibarilə sülhsevər və qonaqpərvər xalqdır”, deyə N.Axundova bildirib.
Onun fikrincə, iqtisadi və siyasi təmaslarla yanaşı, yaxınlaşma prosesini daha az ağrılı və daha səmərəli edə biləcək humanitar və mədəni təşəbbüslər də həyata keçirilməlidir.
“Bu prosesi daha yumşaq və təsirli edə biləcək bütün vasitələr işə salınmalıdır. Mədəniyyət də həmin vasitələrdən biridir”, deyə N.Axundova qeyd edib.
O əlavə edib ki, münasibətlərin normallaşmasının ən vacib şərtlərindən biri coğrafi və tarixi reallıqların düzgün dərk edilməsidir.
“Başqa yol yoxdur. Napoleon vaxtilə deyirdi ki, coğrafiya taledir. Bizim taleyimiz belədir. Bunu yalnız biz deyil, qarşı tərəfin nümayəndələri də anlamalıdır”, deyə o vurğulayıb.
N.Axundovanın sözlərinə görə, mədəni əlaqələr beynəlxalq əməkdaşlığın həm təhlükəsiz, həm də səmərəli kanallarından biridir.
“Mədəniyyətdən keçən yol mühüm, təsirli və təhlükəsiz yoldur. Heç vaxt unutmaq olmaz ki, mədəni diplomatiya böyük diplomatiyanın ən mühüm istiqamətlərindən biridir”, deyə N.Axundova bildirib.
O, həmçinin tolerantlığın və milli azlıqların mədəniyyətinə hörmətin Azərbaycan cəmiyyətinin təməl dəyərlərindən olduğunu qeyd edib. Azərbaycanda yaşayan bütün xalqların nümayəndələri Vətən müharibəsi dövründə birlik və həmrəylik nümayiş etdiriblər.
N.Axundova əlavə edib ki, Azərbaycan bütün rəngləri özündə birləşdirən olduqca parlaq və zəngin bir palitradır.
“Bu, sonda vahid bir harmoniyaya çevrilən mozaikadır”, deyə Nigar Axundova fikrini yekunlaşdırıb.
Oxuculara verilişin tam videoyazısını təqdim edirik:
